Helô, fy enw i yw Gillian

Pa gymorth ydych chi’n ei gael neu wedi’i gael gan weithwyr proffesiynol?

Dwi’n teimlo nad oes unrhyw gefnogaeth GO IAWN. Mae’n fwy fel gwirio a blychau ticio pan fydd ymweliadau’n digwydd. Does dim ymdrech wirioneddol i gefnogi rhieni newydd sydd wedi bod trwy’r system ofal, ac nid oes unrhyw gefnogaeth sy’n ystyriol o drawma ’chwaith i rieni newydd ar ôl gadael gofal neu tra eu bod yn y system ofal o hyd. Mae llawer o ragdybiaethau, barnu a disgwyliadau y bydd y plentyn yn debygol o gael ei dderbyn i ofal, yn aml yn seiliedig ar gronoleg y rhieni yn ystod eu cyfnod mewn gofal.  

Dwi wedi sylwi wrth ddarllen fy ffeil fy hun mai dim ond y wybodaeth negyddol sy’n cael ei chofnodi, byth y pethau da. Er enghraifft, ar ôl cael fy mhlentyn cyntaf, fe ddechreues i fynd i’r coleg pan oedd hi tua blwydd oed. Fe astudies i’r Gwyddorau Cymdeithasol ac fe wnes i hyn am 2 flynedd. Does dim gwybodaeth am hyn wedi’i chofnodi ac mae hyn yn batrwm ar draws fy ffeiliau. Dwi’n teimlo bod hyn yn rhoi darlun anghytbwys o fywyd person, gan wneud y dyfarniadau a’r rhagdybiaethau y sonies i amdanyn nhw uchod yn annheg a heb fod wedi’u seilio ar yr HOLL ffeithiau.  

Yn aml, mae gweithwyr cymdeithasol yn symud ymlaen i rolau neu swyddi newydd yn weddol gyflym a gall un plentyn / person ifanc weld llawer o weithwyr cymdeithasol o fewn 5+ mlynedd. Felly, pan fydd gweithiwr cymdeithasol newydd yn cael ei neilltuo, mae’n darllen y wybodaeth flaenorol sydd ar gael iddo. Bryd hynny, fe all wneud dyfarniadau ynghylch sut mae’n credu y bydd pethau’n mynd, yn hytrach na ffurfio ei farn ei hun am achos person a phenderfynu pa gefnogaeth y mae angen ei threfnu.  

Yn fy mhrofiad fy hun, fe ofynnes i am gefnogaeth benodol, ac fe gymerodd hynny dipyn o ddewrder. Roeddwn i’n onest iawn ac yn agored am y problemau roeddwn i’n eu cael ar y pryd, a oedd yn cynnwys dibyniaeth a cham-drin domestig. Doedd dim cefnogaeth yn cael ei rhoi ar gyfer y materion hyn, ond cafodd fy merch ei rhoi ar orchymyn, ac yn fuan ar ôl hynny cafodd ei chymryd o’m gofal. Roeddwn i’n adnabod llond llaw o bobl yn fy ardal i bryd hynny, i gyd gyda’r un problemau, i gyd gyda phlant yr un oed â fy un i, i gyd â chysylltiad gwaith cymdeithasol. Dwi wedi meddwl weithiau, a oeddwn i’n darged hawdd i fy mhlentyn gael ei gymryd oddi arnaf oherwydd fy mhrofiad o ofal? Mae’n rhaid i mi ddweud, dwi ddim yn bychanu’r ffaith yr oedd angen cymorth arna’ i bryd hynny a dwi’n cymryd cyfrifoldeb llawn am fy ngweithredoedd ar yr adeg honno yn fy mywyd. Ond dwi’n credu efallai y byddai pethau wedi bod yn wahanol petawn i wedi cael y gefnogaeth iawn ar yr amser iawn.